NAGA CITY – Pigtawan-duon kan sarong Psychologist na mayong pigpipiling edad an depresyon.
Sa entrevista kan Bombo Radyo Naga ki Melvin Dasco Angeles, Registered Psychologist/ Registered Psychometrician, sinaysay kaini na siring kan napabaretaan na nagpatiwakal na sarong soltero sa sarong simbahan sa siyudad nin Naga, an nagpapahiling na mayong pigpipiling edad an depression.
An depresyon an nawawaran nin gana sa gabos nin bagay, siring na sana kan mga bagay na kinatuodan ng gibuhon.
Naapektaran man kaini an pagkakan, pagturog asin an pang-urualdaw na pamumuhay kan tawong nakakaeksperyensiya kan siring na helang na naghahantong sa pag-kakaigwa nin suicidal thoughts.
Mientrastanto, piglinaw man ni Angeles, na manlaen-laen na factor an pigkokonsiderar antes makaeksperyensiya nin depression.
Kabali na digdi an trauma na nakua gikan sa pagkaagi, naeeksperyensiyahan sa laog kan harong, mga tawong nakakaibahan asin an presenteng problemang kinakahampang.
Apwera pa digdi, dapat man soboot bantayan kan saindang mga kaparientes o amiga an saindang kaibanan na dae nagheheras kan saindang namamatean.
Pig-suhestyon man ni Angeles sa publiko na aramon kun ano an saindang namamatean asin enkaso nakakaeksperyensiya nin kakaiba – siring na sana kan pag-iisip kan maindatang gibuhon, kaipohan na magbisita o magpacheck sa Psychologist o Psychiatrist.
Enkaso man dae tulos makapagpahiling sa Psychologist o Psychiatrist, maghanap nin taong madudulokan o mapagsasabihan kan saindang namamatean.
