NAGA CITY – Pigtawan-duon kan sarong midwife sa barangay Sta. Cruz, Naga City an importansiya kan pagpapabakuna orog na sa mga omboy.
Sa entrevista kan Bombo Radyo Naga ki Shiela Marie B. Responde – Barangay Midwife, sinaysay kaini na an bakuna an nagtatao nin proteksiyon sa mga helang kun saen sa paagi kaini pwedeng maibitaran an pagkapit kan manlaen-laen na helang sa lawas kan sarong tawo orog na soboot sa mga omboy.
Dugang pa kaini na an BCG (Bacillus Calmette-Guérin) vaccine an bakuna tanganing maibitaran an TB, mantang an hepatitis B tanganing dae magkaigwa nin helang na hepa, asin an pentavalent vaccine o an pig-aapod na 5 in 1 na pigbibilog kan diphtheria, tetanus, pertussis, hepatitis B, asin an Haemophilus influenzae type b (Hib).
Siring man sigun pa ki Responde, yaon man an Oral Polio Vaccine (OPV) asin an anti pneumonia vaccine magin kun mag-edad na an omboy nin siyam na bulan importante soboot an sa tigdas o an anti-measles vaccine.
Pigtawan-duon pa kaini na kun an omboy mag edad nin sarong taon, kaipuhan na mabakunahan ini nin panduwang anti-measles na igwa na nin combination na pig-aapod na MMR o an measles, mumps, asin rubella.
An mga nasambitan ng bakuna an importante soboot sa mga kaakian huli man ta an maprotehir sa sainda tanganing dae man tulos dapuan kan mga helang.
Mientrastanto, sigun pa ki Responde na saro sa mga lakdang na saindang piggibo iyo an bados pa sana an ina, pigtutukar na soboot ninda an importanteng dapat na maaraman kan sarong babae komo sarong ina, asin saro pa sa mga adbokasiya ninda an pagtaong impormasyon kun ano an importansiya kan pagpapabakuna.
