NAGA CITY – Ipigheras kan may kansadiri kan Camarines Sur Multi-Purpose Cooperative an sarong programa kan Department of Agriculture na Kadiwa ani at Kita program kun saen ini man an makakatabang sa mga paraoma tanganing maipabakal an saindang ani.
Sa entrevista kan Bombo Radyo Naga ki Annielen L. Panerio, CPA – CEO, Camarines Sur Multi-Purpose Cooperative, sinaysay kaini na an mga pig-produsir kan mga lokal na paraoma partikularmente sa probinsiya nin Camarines Sur asin miyembros kan Camarines Sur Multi-Purpose Cooperative an saindang pigtatabangan na mabakal asin maipbakal an mga harvest kaini direkta sa mga konsumidores.
Dugang pa kaini, magin an bakong miyembros kan nasambitan ng kooperatiba an pwedeng magsuplay kan saindang local produce siring kan mga gulay, prutas magin paroy sa sainda asin ini man an tanganing maprotehiran an mga paraoma sa tamang presyo.
Sigun pa ki Panerio an CamSur Cooperative soboot an igwang kadiwa store na itinao kan Department of Agriculture na makukua sa Cadlan, Pili, Camarines Sur.
Pigtawan-duon pa kaini na dae gabos na mga consumers asin miyembros ninda an nakakapasiring sa saindang Kadiwa Store kaya igwa soboot sindang Kadiwa on wheels kun saen pigdadara kaini an mga pig-produsir kan mga paraoma asin pigdadara sa mga buro-barangay kun yaon saen an mga konsumidores tanganing masierto an saindang costumers asin ma-enkaminar an mga ini na tangkilikon an mga local na produkto.
Obheto pa kaini an tanganing matabangan an lambang saro na mag-asenso orog na an mga paraoma tanganing mas ganahan an mga ini na magtanom, siring man tanganing padagos sooot na igwang makakakan an mga konsumidores.
Sa ngunyan pakiulay na sana ni Panerio sa mga konsumidores na tabangan soboot an mga lokal na paraoma na mapadakula an saindang hanapbuhay partikularmente na sa pag-oma, tanganing mas lalong mag-asenso an Pilipinas magin an mga Pilipino.
