Nakalikom nin dae mababa sa P20 milyon an nakolektang kantidad kan Philippine National Police (PNP) gikan sa charity boxing match na isinagibo kasuodma, Hulyo 27, 2025.
Sigun ki PNP Chief PGen. Nicolas Torre III nakakolektar an saindang opisina nin labi sa P16.3 milyong kantidad kan mga donasyon mantang nakaresebir man nin mga bagas, delata asin iba pang relief items an Pambansang Pulisya gikan sa manlaen-laen na sponsors kaini.
An nasambitan ng pondo asin relief items an ipigheras sa mga naapektaran kan mga nakalihis na bagyo kun saen naenot nang nagheras an PNP sa mga residente sa Baseco Compound na saro sa mga lugar na binaha dara kan padagos na pag-uuran kan mga nakalihis na aldaw.
Mientrastanto an iba pang pondo, itinao na sa opisina kan Department of Social Welfare and Development (DSWD), Philippine Red Cross (PRC) asin magin sa iba pang government organizations sa Quezon City.
Sa ngunyan, naipaabot na an mga pangenot na tabang na ini sa mga tamang ahensiya asin nagkapirang residente mantang padagos man sa saindang pagtabang sa mga relief operations an kapulisan kan PNP komo pagpapaabot nin tabang sa mga labing naapektaran kan mga kalamidad.
Nagpasalamat man an hepe sa mga nagtangkilik sa programa na ini asin magin sa mga sponsor na nagtao kan saindang tabang tanganing magin matrayumpo an nasambitan ng charity boxing match.
