Ipigreport ni Agriculture Secretary Francisco P. Tiu Laurel Jr. an pag-angat kan kabilogang produksiyon kan mais asin paroy sa Pilipinas sa enot na parte kan 2025.
Ini an basado sa bagong report na iniluwas kan Philippine Statistics Authority (PSA).
Sa pagkarkulo kan PSA, an palay production sa kabangang parte kan 2025 an nagpakol sa 9.08 million metric tons, mas halangkaw ini nin 6.4% gikan sa 8.53 million tonelada sa kaparehas na panahon kan nakalihis na taon.
Naglangkaw man nin 2.7% asin nag-abot hasta 2.12 million ektarya an kabilogang lugar na natanoman kan paroy makalihis gamiton nin husto kan mga paraoma an tubig uran sa rainfed na mga lugar.
An karaniwang ani sa enot na parte kan lambang taon an kalimitang nag-aabot sa labi 40 percent kan taunang produksiyon, basado sa record kan DA.
Siringman, nagluwas sa pinakahuring datos na nalampasan kan nasyon an 2025 target kan DA na 20.46 million metric tons.
Nahilingan man nin paglangkaw kan produksiyon kan mais, naikurit an 5.2 percent year-on-year nin 3.9 million tonelada. Ini an dara na man kan 27% na paglangkaw sa second quarter output na 1.5 million tonelada.
Sa ibong kaini, an kabilogang lugar na natanoman nin masi an bahagyang nagbaba nin 1.049 million ektarya gikan 1.052 million ektarya kan nakalihis na 2024.
Sigun ki Sec. Laurel Jr., dakulang tabang digde an magayon na kondisyon kan panahon asin pagtinir kan suporta kan gobyerno para sa mga paraoma sa bilog na nasyon.
