NAGA CITY- Nagpapadagos an programa kan City Veterinary Office tanganing masimbagan an problema dapit sa mga basay-basay na Ido asin Ikos sa tinampo.
Sa entrevista kan Bombo Radyo Naga ki Dr. Johann Michael R. Sales, Head kan City Veterinary Office, sinaysay kaini na nagpapadagos an saindang animal impounding sa presente siringman an pagkundusir nin house-to-house anti-rabies vaccination sa bilog na siyudad.
Alagad, sigun ki Sales dae soboot ninda maikundusir nin ara-aldaw an nasambitan ng house-to-house anti-rabies vaccination nin huli sa kakulangan sa personahe.
Huli kaini, nagrequest na an nasambitan ng opisina nin dugang na personnel sa Human Resource tanganing mapagsabay an duwang programa.
Paliwanag pa ni Sales, dae sinda makakapokus sa impounding enkaso dae pa tapos an vaccination.
Mientrastanto, liwat man na pigtawan duon kaini na an pinaka-ugat kan problema iyo man an pagigin iresponsable kan nagkapirang mga pet owners sa saindang mga ataman na mga hayop.
Igwa soboot kaya na pigpapabayaan sana na magbasay-basay an saindang mga ataman sa tinampo na nakakaperwisyo siringman peligroso sa ibang mga tawo.
Sa ngunyan, liwat na nangapudan an doktor sa publiko na gampanan an saindang mga responsabalidad sa mga pagsasadiring mga hayop tanganing malikayan an pagbungkaras kan problema sa komunidad.
