Aram baya nindo mga ka-bombo, an mag-agom gikan sa Colombia pinagaranan an saindang bagong mundag na aking babae na “Chat Yipiti” na hango sa AI program ChatGPT.
Sa ibong kan kakaibang pangaran, nairehistro an aki na mayong pagtutol sa National Registry office sa banwaan kan Cereté.
Sigun sa mga magurang ni Chat Yipiti Bastidas Guerra pinili ninda an pangaran komo pagtataong pugay sa era kan artificial intelligence.
An nasambitan man na pag-urulay an nakaguno nin manlaen-laen na reaksyon gikan sa mga netizens kun saen an iba nagsasabi na posibleng maka-apektar sa masunod na panahon an pangaran kan aki.
Alagad, an kaso na ini an dae naman kakaiba sa Colombia orog na ta igwang historya an nasyon na irehistro an mga kakaibang pangaran na an iba an gikan pa sa sports, movie, music stars asin iba pa.
Mientrastanto, sa Colombia, maski dae pigsaro-saro sa batas an listahan kan mga ipinagbabawal na pangaran, igwang otoridad an National Civil Registry na dae tugutan an pagpaparehistro sa pangaran kan aki orog na kun pinagtutubudan na posible ining magdara nin maraot sa sarong indibidwal.
