Liwat na pighagad kan mga abogado ni dating Presidente Rodrigo Duterte sa International Criminal Court (ICC) pre-trial chamber na tulos aksiyunan an saindang petisyon para sa paramientras na paglaya, sarong bulan antes an nakatalaang confirmation hearing kan dating lider sa The Hague.
Sa sarong heavily redacted na dokumentong igwang petsang Agosto 19, pigtawan-duon kan depensa na tulos nang palibrehon si Duterte sa irarom kan anumang kondisyon sa itatalaan kan korte.
Sigun pa sa mosyon, pwedeng dae mag-atendir si Duterte sa confirmation proceedings, alagad kun kakaipuhanon, pwede ining isagibo sa paagi kan videoconferencing.
Dugang pa digde, pigsierto kan depensa na pwede mang masierto an monitoring conditions, asin contact restrictions sa paagi kan [REDACTED].
Tinuligsa man an punong abogado ni Duterte na si Nicholas Kaufmann an posisyon kan Prosecution na kinakaipuhan an sarong ad hoc cooperation agreement para sa paramientras na pagpapalibre.
Ilusyon sana soboot ini huli ta sulamenteng duwang nasyon pa sana an igwang siring na kasunduan sa ICC.Hurot kan depensa, nakapreparar na an [REDACTED] na magsunod sa gabos kan kondisyong nakasaysay sa Article 4(2) kan Model Agreement on Interim Release.
Kan nakalihis na bulan, naghagad na man an kampo ni Duterte na ipagpauktaba paramientras kan ICC an pagdedesiyon sa saindang petisyon hasta makumpleto kan depensa an gabos kan kaipuhang impormasyon.
Marurumdumang, nasa detention facility kan ICC si Duterte puon pa kan katahawan kan Marso makalihis ining ipasakamot kan mga otoridad kan Pilipinas sa international tribunal, basado sa request kan Interpol.
Si Duterte, ika-16 na presidente kan nasyon, nahahampang sa kasong crimes against humanity katakod kan ribu-ribong paggadan sa irarom kan saiyang war on drugs, kun saen kaibahan sa mga biktima an mga menor de edad.
