NAGA CITY- Pig-activate kan Police Regional Office Bicol an saindang disaster response teams katakod kan padagos na naeeksperyensiyahang epekto kan low pressure area na pag-uuran sa Bicol Region.
Sigun ki PRO-5 Director Brig. Gen. Nestor Babagay Jr., sainda nang pigsugo an mga commanders na makipag-koordinar sa mga local government units (LGUs), partikularmente sa pag-ibakwar sa mga residente na yaon sa low-lying asin flood-prone communities.
Pigsaysay kan opisyal na an kasalbaduhan kan mga Bikolano an saindang prayoridad.
Katakod digde, yaon soboot an mga kapulisan na preparadong magserbe, magproteher asin magresponde sa oras kan emerhensiya.
Mientrastanto, kabilugang 563 na police personnel, kabali na an 453 gikan sa Reactionary Standby Support Force asin 110 sa search, rescue asin retrieval teams an nakapreparar para sa deployment sa mga apektadong lugar.
Mantang an Critical Incident Monitoring Action Team an padagos man na naka-monitor sa raot kan panahon tanganing masierto an kaipuhan na aksyon dapit digde.
Sa ngunyan, padagos na pig-aabisuhan an publiko na magin alerto asin magsunod sa mga panundunan.
