Ipinagsugo ni Department of Finance (DOF) Secretary Ralph Recto an tulos na activation kan calamity assistance packages sa mga lugar na pigyugo-yugo kan magnitude 6.9 na linog sa Cebu.
Kaibahan digde an pagtatao nin cash aid, concessional loans, payment schemes asin service subsidies.
Ini an nakapalaog sa inisyung circular kan sekretaryo na nagsusugo sa mga government financial institutions (GFIs) asin government-owned and controlled corporations (GOCCs) na parekason an pagtatao nin serbisyo sa publiko kasunod kan mga kalamidad.
Apwera digde, pigsugo man an mga nasambitan ng institusyon na parekas an pagproseso sa mga claims para sa mga naraot na ari-arian, pag-asister sa mga borrower sa mga apektadong lugar asin pagtatao nin short-term loans para sa pagpapakarhay kan mga harong asin pagrekober sa saindang kabuhayan.
Pigsisierto man kan sekretaryo an padagos na financial services kan mga bangko, ATMs asin iba pang service channels.
Pigsierto man kan sekretaryo na igwang bastanteng pondo an gobyerno tanganing masuportaran an mga biktima orog na an mga paraoma, obrero, estudyante, asin lambang pamilyang Pilipino na apektado kan trahedya.
Nakapreparar man soboot an resources na i-activate sa irarom kan Quick Response Fund (QRF) kan gobyerno asin National Disaster Risk Reduction and Management Fund tanganing magtao nin tulos na relief asin recovery operations siring man an suporta para sa pagpapakarhay kan mga naapektaran na pasilidad, imprastraktura asin heritage sites.
Mientrastanto, nakapreparar an Social Security System na magtao nin P10 bilyon hasta P15 bilyon sa irarom kan Calamity Loan Program para sa mga miyembrong apektado kan pagyugo-yugo.
Matao man an Government Service Insurance System nin tabang pinansiyal para sa mga Pilipinong apektado kan linog sa paagi kan calamity asin emergency loans.
Mantang an mga Pag-IBIG members man an pwedeng mag-avail nin calamity loans asin insurance claims para sa mortgaged houses. Sa minor repairs, pwedeng mag-avail an mga miyembro nin short-term improvement loans.
