Bukas an Malacañang na isabay sa imbestigasyon kan Independent Commission for Infrastructure (ICI) an iba pang maanomalyang proyekto kan gobierno siring kan “haunted hospitals” kan Department of Health (DOH) asin overpriced na farm-to-market roads kan Department of Agriculture (DA).
Sigun ki Palace Press Officer Claire Castro, gabos na kwestyonableng proyektong pang-imprastraktura dapat masirip kan ICI.
Pupwedeng isumiter sa komisyon an mga dokumento asin ebidensiya tanganing tolos na maipaapod an mga opisyal na imbwelto.
Marurumduman nagsunad nin resolusyon si Rep. Leila de Lima tanganing imbestigaran soboot an pag-aaksaya kan pondo kan DOH na nagresulta sa abandonado, dae kompleto, asin non-operational na mga ospital asin health facilities.
Pigbulgar man ni Sen. Sherwin Gatchalian na lampas P10 bilyon an nalustay huli sa labi-labing presyo kan mga farm-to-market road projects kan DA puon 2023 hasta 2024.
