NAGA CITY – Pigsierto kan National Food Authority Camarines Sur matanos an kalidad kan pinapabakal na P20 na kilo kan bagas kan saindang opisina.
Sa entrevista kan Bombo Radyo Naga ki Jennilyn Celestial, Acting Branch Manager, NFA-Camarines Sur, sinaysay kaini na presenteng pigsusuportaran ninda an programa kan Department of Agriculture na P20 bagas kun saen mas prayoridad na mapabakalan iyo an mga vulnerable sector.
Katakod digde, pigtawan duon kan opisyal na padagos an pagpapabakal kan baratong bagas partikularmente sa mga paraoma, 4ps, PWD, asin sa mga minimum wage earners.
Mientrastanto, tanganing makakua o makapag-avail kan programa kinakaipuhan magpresentar nin identification card komo patotoo na nasa vulnerable sector an siisay man na mabakal.
Piglinaw man kan opisyal na magayon an kalidad kan pinapabakal na bagas alagad dae ini maikukumparar sa mga commercial na bagas huli ta ini gikan sa paroy na nakaimbak pirang bulan sa mga warehouse kan NFA.
Alagad pigsierto man ni Celestial na malinig asin salbado kakanon kan publiko orog na ta mabusisi asin mahigot sinda pag-abot sa mga pigbabakal na paroy gikan sa mga paraoma.
Sa ngunyan, kun enkaso igwa nin reklamo gikan sa nabakal na bagas pwede soboot magpasiring sa saindang opisina tanganing masolusyunan an nasambitan ng problema.
