Photo © web

Nagpatanid si Deputy Speaker Ronnie Puno kasuodma, Lunes, na garo igwang planong panraraot kontra ki dating Speaker Martin Romualdez, kasabay kan pagluwas kan mga report na pigkokonektar an kongresista kam Leyte sa isyu kan mga kontrobersiyal na farm-to-market roads (FMR).

Sigun ki Puno, dae tama an timing kan mga paratang orog pa ta nakatalaang maghampang si Romualdez sa Independent Commission for Infrastructure (ICI).

Hurot kaini na igwang mga tawong nagtutukdo sa iba tanganing makalikay sa paninimbagan.

Sinaysay pa man ni Puno na kadakol na mga alegasyon ngunyan an piggagamit sana tanganing ilihis an atensiyon kan publiko gikan sa tunay na may sala.

Advertisement

Aminado si Puno na ini an enot na nagbanggit kaidto kan mga problema sa FMR program, asin pig-ako kaining igwang mga inaabuso sa proyekto.

Alagad paglilinaw kaini, an mga FMR projects sa Leyte an sadit sana asin legal, siring man nagpasar sa mga pagsusuri kan Department of Agriculture (DA) asin Department of Public Works and Highways (DPWH).

Ipinaliwang man kaini na bako sanang paroy an sakop kan farm-to-market roads – gabos kan produktong agrikultural an dapat makinabang digde.

Nagtutubod si Puno na an mga akusasyon ki Romualdez an parte kan pig-aapod kaining “lynch mob mentality” o sabayang pambabasol sa sarong tawo nin mayong bastanteng ebidensiya.

Nangapodan si Puno sa publiko asin media na magin mapanuri sa mga bareta asin aramon kun an mga ini an basado sa totoong impormasyon o opinion sana.

Pigtawan-duon man kaining igwang ining tiwala sa ICI alagad nagpatanid na igwang mga tawong pwedeng maggibo nin paagi tanganing ipasa an basol sa iba.

Sa huri, pig-enkaminar ni Puno an publiko na pag-adalang marhay an mga ebidensiya asin dae pagpabayaang maligaw sa salang impormasyon.

Advertisement