Piglalaoman na mababa an pag-uswag kan ekonomiya kan Pilipinas sa masunod na taon, na harayo sa target kan administrasyong Marcos, mantang kinakahampang kan nasyon an mga naglalang angat gikan sa mga patakarang proteksiyonista kan Estados Unidos hasta sa naghehewas na imbestigasyon sa katiwalian na pupwedeng lampas pa sa mga proyektong igwang kinaaraman sa flood control.
Susog sa report, pigbaba kan BMI Country Risk & Industry Research, an sarong yunit kan Fitch Group, an saindang forecast sa paglago kan ekonomiya kan Pilipinas sa 5.2 porsyento para sa 2026 mula sa dating 6.2 porsyento.
Dugang pa kan BMI, an mas halangkaw na taripa kaan US posibleng magkawsa nin dugang na pasanonsa panluwas na kalakalan kan nasyon asin makabawas sa kumpiyansa kan mga mamumuhunan, na pupwedeng magpauntok sa paglaog kan mga dayuhang mamumuhan na nagtatao nin trabaho.
Nagpautob an US nin 19 porsyentong taripa sa mga produktong gikan sa Pilipinas, mantang mayong karibay na taripa sa mga produktong gikan sa Amerika.
Mientrastanto sa laog kan nasyon, pigsaysay kan BMI na an nagraraom na imbestigasyon soboot sa katiwalian sa mga proyektong flood control na pinondohan kan gobyerno saro pang huma sa pag-uswag kan ekonomiya.
Sa presente, pigkakarkulong malago sana nin 5.4 porsyento an ekonomiya ngunyan na taon, sigun sa BMI, huli sa piglalaomang pagmamantenir kan maluyang pamumuhunan sa kabangaan kan taon kawsa kan dae sierto na pandaigdigang kamugtakan asin hababang paggastos sa imprastruktura.
