NAGA CITY – Personal na nagkundusir nin inspeksiyon an City Director kan Naga City Police Office sa Concepcion Pequeña Cemetery. Sa entrevista kan Bombo Radyo Naga ki PCOL Gilbert P. Fariñas, City Director, NCPO, sinaysay kaini na sa lado man kan mga kapulisan, preparado na soboot an sainda man na mga personahes kun saen naka-deploy na man an mga ini para sa magtinir kan kasalbaduhan kan gabos sa pag-obserbar kan Undas ngunyan na aldaw.
Dugang pa kaini na 10 personahes gikan sa saindang kabuhan an naka-deploy sa nasambitan ng sementeryo tanganing magtaong asistensiya sa mga mabirisita sa puntod man kan saindang mga mahal sa buhay na enot ng nagtalikod sa kinaban.
Sigun pa pa ki Fariñas na sa presente mayo pa man anuman na insidente an nairerehistro katakod man sa nasambitan ng aktibidad.
Mientrastanto, pigheras pa kan opisyal an mga ipinagbabawal na darahon tuyong siring na kasiributan arog kan mga patarom, ipinagbabawal man an pagdara nin arak sa laog kan sementeryo asin iba pa na pwedeng magin rason kan anuman na kariribokan.
Pagsierto man ni Fariñas, na yaon an saindang mga personahes preparadong magtabang enkaso kaipuhanon kan lambang indibidwal na mapasiring sa mga kampo santo, asin yaon man soboot an saindang karatola na nakabugtak sa luwas kan Concepcion Pequeña Cemetery asin digde man nakapalaog an mga dae dapat gibuhon sa pag-obserbar kan Undas ngunyan na taon.
