Binanggit sa pagdangog kan Senate Committee on Ways and Means an manlaen-laen na paagi na ginibo kan mga Discaya tanganing makalaog an nagkapira nindang mga mamahalong lunadan sa nasyon.
Tinukoy ni Bureau of Customs (BOC) Commissioner Ariel Nepomuceno an manlaen-laen na paagi na ginibo kan mga Discaya tanganing makapagpalaog sa nasyon nin mga luxury cars siring kan dae pagbabayad nin tama, pagdodoktor kan mga dokumento, pagdadara sa X-ray asin paglaog nin mayong import entry asin certificate of payment.
Nagtutubod si Nepomuceno na igwa talaga nin modus sa pagpapalaog kan mga mamahalong lunadan siring kan Bugatti na pighihinalaang ilinaog sa Batangas port alagad an nakabugtak sa import entry asin certificate of payment an sa Port of Davao ini binayadan.
Sa hiling pa ni Nepomuceno, dae man na X-ray an lunadan sa port o dinaya pati an X-ray huli ta ibang lunadan an nagluwas imbes na Bugatti.
Igwa mang mga BOC employees na kasabwat an mga Discaya sa Cebu, Davao, Batangas, asin sa iba pang lugar na presente na mang pig-iimbestigaran kan ahensiya.
Nasa sampulong empleyado kan BOC an naisyuhan na nin show cause order mantang pigsisirip na man kan Customs an mga importers kan mga luxury cars na iligal na nailaog kan mga Discaya sa nasyon.
Siring man, sinaysay kan BOC na dae man gabos kan mga luxury cars kan mga Discaya an iligal huli ta igwang 17 lunadan na nabakal nin regular gikan sa mga respetadong car distributors.
