Mayong katotoohan asin mayong basehan an soboot alegasyon na igwang P1-billion na suhol na pig-alok ki dating Manila Economic and Cultural Office (MECO) Chairman asin dating Labor Secretary Silvestre “Bebot” Bello III.
Ini an kasimbagan ni Palace Press Officer Usec. Claire Castro, makalihis magluwas an impormasyon na pigsasabing pigtesting soboot na impluwensiyahan si Bello tanganing magdalagan komo kongresista sa Davao City asin magin katunggali ni Representative Isidro Ungab.
Sigun ki Castro, personal kaining nakaulay si Presidente Ferdinand “Bongbong” Marcos Jr. dapit sa nasambitan na na isyu, asin pigsierto soboot kan Presidente na mayo nin katotoohan asin dae nangyari an nasambitan na suhulan.
Padagos man na nangapudan an Malacañang sa publiko na magin mapanuri asin likayan magpakuriyat kan dae beripikadong impormasyon, orog na kun ini pupwedeng magkawsa nin salang persepsyon sa publiko.
