Aram baya nindo mga ka-Bombo, dae napugulan kan Indonesian conservationist na mapahibi makalihis nindang mahiling sa gubat an sarong pambihirang burak na 13 taon na kaining pighahanap.
Sa sarong video mahihiling an paghibi ni Septian Andriki o “Deki,” makalihis nindang mahiling an Rafflesia hasseltii, na “a plant seen more by tigers than people,” sigun sa University of Oxford. Saro pa sa pinaka-rare na species kan Rafflesia an Rafflesia hasseltii.
Hinanap ini ni Deki nin 13 taon asin nag agi ining sa manlaen-laeng klase nin peligro mahiling sana an nasambitan ng burak. Nag iba si Deki sa team kan mga researcher na nagsasagibo nin pag-aadal dapit sa mga Rafflesia.
Naggugol sinda nin 23 oras sa Sijunjung, West Sumatra antes ninda nahiling an Rafflesia hasseltii sa gubat kun saen nag iistar an mga tigre asin rhino.
Sa ibong kan peligro, naghalat sinda nin hasta sa magbanggi tangani sana mahiling an pamumukadkad kaini. Sarong parasitic flower an Rafflesia na mahihiling sa Southeast Asia, asin pigkonsiderar na world’s largest single flower.
Dipisil na pag-adalan an nasambitan ng burak huli ta madalas sana ining mahihiling sa masusukal na gubat. Dae man naghahaloy an buhay kaini.
An paghahanap sa Rafflesia hasseltii an parte kan major regional research project na pag-aadalan an full genetic relationships kan mga Rafflesia.
Sabay-sabay ining ginigibo kan mga researcher sa Indonesia, Malaysia asin Pilipinas. Target kan mga siyentista na makapagluwas nin rekomendasyon katakod kan conservation strategies na dapat gibuhon na basehan sa genetic asin ecological findings sa mga Rafflesia.
