Nakumpiskar kan Police Regional Office Bicol an nasa P9.52 million na kantedad kan iligal na droga asin naarestrar an 26 na indibidwal sa sarong semanang pagkundusir kan mas pinahigot na anti-drug operations puon Nobyembre 26 hasta 30.
Sa nasambitan ng peryodo, pigsaysay ni PRO-5 Regional Director Brig. Gen. Nestor Babagay Jr na an saindang mga personahe an nagkundusir nin nasa 25 operasyon na nagresulta sa pagkaka-arestrar kan nasa 26 na indibidwal kabali na an tolong high-value targets asin 23 na street-level na suspek.
Katakod kaini, kabilugang 1,400.524 grams kan shabu asin 47.26 grams kan marijuana an nakumpiskar.
Sa gabos man na probinsiya kan Rehiyon, an Camarines Sur an igwang nairehistrong pinakadakulang porsyon kan nasamsam na iligal na droga na nagkakantedad nin P7.34 million, pigsundan kan Albay na igwang P1.66 million; Sorsogon na igwang P68,960; Masbate na igwang P68,000; Camarines Norte na igwang P40,800.00; Naga City na igwang P3,600; asin an Catanduanes na igwang P2,720.
Meintrastanto, an Regional Police Drug Enforcement Unit nakakumpiskar man nin illegal drugs na nagkakantedad nin nasa P333,200.
Sa ngunyan, pigsierto kan PNP Bicol na padagos an saindang mahigot na mga programa asin lakdang tanganing labanan an pagkuriyat kan anuman na klase kan iligal na aktibidad sa Bicol Region.
