NAGA CITY- Pigreport kan DTI-Camarines Sur na nagkaigwa nin kadikit na paglangkaw sa presyuhan kan nagkapirang Noche Buena Products.
Sa entrevista kan Bombo Radyo Naga ki Jay Percival Ablan, Provincial Director kan DTI-Camarines Sur, sinaysay kaini na nagpuon sinda kan pagmonitor sa presyuhan kan nasambitan ng mga produkto kan nakalihis na Lunes, December 1, 2025.
Sigun ki Ablan kun ikukumparar sa mga nakalihis na mga bulan, nairehistro an 30% na paglangkaw sa Noche Buena Products, 20% na pagbaba sa nagkapirang produkto mantang nag-abot man sa 50% an mayong paghiro sa pigpapabakal na mga produkto.
Kun hihilingon an siring na statistics, maikokonsederar na affordable pa man an mga noche buena products kun saen marhay soboot ini para sa mga consumer o parabakal tanganing igwang pagpilian ngunyan na kapaskuhan.
Katakod digde, an nagkapira sa mga produkto na nahilingan nin kadikit na paglangkaw iyo an Ham huli sa nagbungkaras na ASF, tomato sauce asin iba pa.
Alagad, pigsaysay man kan opisyal na kadakol pagpipilian na mas baratong brand, kaipuhan sana na magin matalino an mga parabakal ngunyan na Holiday season partikular sa pagbakal kan mga Noche Buena Products.
Mientrastanto, pigtawan duon man ni Ablan na sa probinsiya kan Camarines Sur, kadaklan sa mga produkto na pigpapabakal mas hababa pa sa pigtalaan na Suggested Retail Price.
Sa ngunyan, aaramon pa kan nasambitan ng ahensiya kun kumusta an prevailing prices kumparar sa SRP kan mga Noche Buena Products.
