Mas pinakusog asin pinagtibay pa kan Philippine National Police (PNP) an pagbabantay sa mga presyo kan barakalon sa mga merkado tanganing malikayan an mga huma kan profiteering asin hoarding ngunyan na holiday season.
Sigun ki Acting PNP Chief PLtGen. Jose Melencio Nartartez Jr., ini an tanganing masierto na dae maaabuso an mga karapatan kan mga konsyumer asin tanganing mapangatamanan man an mga parabakal sa tahaw kan padagos na paglangkaw kan presyo kan mga barakalon kan karne, gulay, asin iba pa antes an bisperas kan Pasko.
Kasunod kaini, tulos na nagtalaga nin dugang na mga pulis an PNP sa mga merkado, supermarkets, wet markets asin nagkapira pang mga merkado tanganing tulos na makaresponde sa mga posibilidad na pananamantala kan mga retailers asin tanganing malikayan man an hoarding asin panic-buying kan mga konsyumer.
Ini an dara na man kan mahigot nindang koordinasyon sa Department of Trade and Industry (DTI) asin magin sa mga local government units (LGU’s) tanganing mamantinir na bantay-sarado an hiro kan mga presyo asin mga iligal na aktibidad sa siring na panahon.
Mientrastanto, pigsierto man kan Pambansang Pulisya sa publiko na padagos sana an saindang pagsasabo kan nagkapira pang mga lakdang asin mga intelligence driven operations tanganing matukoy asin madakop an mga hoarders asin mga sindikatong pigpoporbarang manipulahon an mga presyo kan barakalon.
