NAGA CITY- Liwat na nagpagirumdom an Camarines Sur Provincial Cyber Response Team sa publiko na likayan an pag-uutang sa Online Lending App.
Sa entrevista kan Bombo Radyo Naga ki PCPT Angelo Babagay, Team Leader kan Camarines Sur Provincial Cyber Response Team (PCRT), sinaysay kaini na kadakol nang kaso an nairehistro dapit sa mapang-abuso na online lending apps o OLA na kun saen labi-labi an pagsisingil nin interes.
Sigun pa ki Babagay, enkaso dae tolos makabayad an sarong tawo na nag-utang nakakareseber ini nin mga threats na nagkakawsa man nin stress.
Huli kaini, kun talagang dae soboot malikayan na mag-utang magpasiring sa mga lehitimong online lending na igwang pisikal na opisina.
Paliwanag pa ni Babagay, oras na mag-utang sa OLA, pigtutugutan o pigtatawan nin access kan sarong indibidwal sa saiyang contact an lending apps na ini.
Mientrastanto, pagirumdom pa kan opisyal sa publiko na magin responsableng borrower huli ta pwedeng masunadan nin stafa an mga tawo na dae nakakabayad nin utang.
Sa ngunyan, kun enkaso nakaka-eksperyensiya nin harrassment asin iba pang dae makatawong pagsingil sa utang tolos soboot na magpasiring sa opisina kan mga kapulisan tanganing matabangan sa magkakanigong aksyon dapit digde.
