NAGA CITY- Preparado na an Philippine Red Cross Camarines Sur sa papaabuton na kapaskuhan asin Bagong taon.
Sa entrevista kan Bombo Radyo Naga ki Maria Felisa Badiola, Chapter Administrator kan Philippine Red Cross, Camarines Sur Chapter, sinaysay kaini igwang binilog na safety services an saindang lado para sa nasambitan ng kasiributan.
Sigun ki Badiola, igwang naka-standby na operation team kun saen iyong nakikipag-koordinar sa mga siyudad o banwaan sa probinsiya kun enkaso kaipuhan kan mga ini nin ambulansiya.
Dugang pa kan opisyal, one call away an saindang organisasyon sa pagresponde sa kinakaipuihan na asistensiya kan komunidad sa panahon kan kapaskuhan asin bagong taon.
Apwera digde, all set naman an saindang mga personahe, ikipahe asin pasilidad na kun saen pirmeng pigche-check an status kan mga ambulansya asin iba pang gamit na bastante ngunyan na holiday season.
Mientrastanto, piglaoman man ni Badiola na mayong mairehistrong biktima kan mga paputok orog na sa pagsabat kan Bagong taon asin mamantinir na salbado an publiko siring kan nakalihis na taon.
Pigsaysay pa kan opisyal na malikay naman sa presente an mga tawo orog na ta well oriented asin aware naman sa siring na panundon.
Sa ngunyan, hagad na sana ni Badiola an tabang kan publiko para sa salbadong komunidad ngunyan na pasko asin bagong taon.
