NAGA CITY- Pigsierto kan pamayuhan kan Abbatoir sa siyudad nin Naga na padagos an saindang operasyon makalihis an kinahampang sa problema dapit sa pag-downgrade.
Sigun ki Anselo Maño, Acting Head kan Naga City Abbatoir mayo man naapektaran sa pagtaraid na munisipyo sa nangyaring downgrading huli ta sa kaparehas na aldaw na saindang nareseber an surat an tolos man na nagibuhan nin aksyon.
Katakod kaini, pig-asegurar man kan opisyal na dae nagbago an rate na pigbabayadan kan mga nagpapabuno kun saen piglalaoman ninda na matriple ini ngunyan na kapaskuhan.
Dugang pa kan opisyal, ngunyan na aldaw asin sa aga December 23 asin December 29 and 30 piglaaloman an dagsa kan mga mapabuno.
Huli kaini, 24 oras an operasyon kan Naga City Abbatoir asin igwang duwang shift.
Boot sabihon an mga lechon, kanding asin iba pa an pigbubuno tuyong aga mantang an mga pigtitinda sa mga merkado an sa bangi.
Mientrastanto, pigsaysay man kan opisyal na dae sinda nagdugang kan mga personahe asin pig maximize sana an mga tawo susog naman sa kaipuhan kan pasilidad.
Siringman, pigheras man ni Maño na dae pa naabot kan Naga City Abbatoir an target na koleksyon para sa presenteng taon huli sa manlaen-laen na factors.
Kabali na digde an pagbawas sa mga nag-aataman nin orig huli sa ASF asin an mga biyaheros na naglalaog asin luwas sa Naga City.
Sa ngunyan, pigsierto na sana kan opisyal na preparado sinda ngunyan na igwang dakulang kasiributan
