NAGA CITY- Orog pang pinahigot kan BFP Pili an fire safety campaign ngunyan na Holiday Season.
Sa entrevista kan Bombo Radyo Naga ki FO1 Cyndi Mae P Serrano, Fire Prevention Clerk, BFP Pili, sinaysay kaini na padagos an saindang mga preparasyon tangani ipaabot sa publiko an mga paagi tangani makalikay sa kasulo.
Sigun ki Serrano igwa nin kampanya an BFP, iyo an Oplan Paalala Iwas Paputok, apwera kaini naglilibot man an mga Operation Personnel sa pagbandilyo kada Brgy asin sa mga kasentruhan na kun saen kadakol nin mga tawo na pwedeng maabutan kan nasambitan ng bandilyo.
Kalakip kaini, iyo man an mga Fire Safety Tips, na kun saen nagkundusir na nin inspections an mga Fire Safety Inspectors sa BFP Pili sa mga stalls na matinda nin mga paputok.
Katakod kaini, mahigot man na pinapagirumdom ninda sa mga paratinda na nagkakanigong igwa nin kanya-kanyang naka standy na mga fire extinguishers sa mga stalls, nakapreparar na sarong baldeng tubig asin buhangin, pagbugtak nin net asin an pagbabawal na magluto o magsindi nin katol o sigarilyo.
Sa mga mawot man na magbakal nin paputok, mas marahay na magbakal sana sa mga lisyensyado asin igwang permit na mga nagtitinda asin mas marahay na sa Physical Stores sana kumparar sa online shops.
Igwa man nin mga designated areas an mga Brgy na tutugutan sanang magpaputok. Mientrastanto, igwa nin 40 BFP personnel asin 6 fire trainees an BFP Pili na nakapreparar na ideploy ngunyan na may kasiributan.
Sa ngunyan, hagad na sana ni Serrano na makalikay an gabos sa peligro kan mga paputok, bako sana sa posibilidad kan kasulo kundi sa injuries na pwedeng makua oras na magpabaya.
Mas marhay na maggamit na sana nin mga alternatibong pamparibok siring kan torotot, kawali, sound systems asin iba pa.
