Aram baya nindo mga ka-Bombo na garo misteryo an nagpapatos ngunyan sa Ogmore-By-Sea beach sa South Wales makalihis na madiskubre kan mga volunteers an ginatos na pares kan “Victorian hobnailed boots” na biglang inanod sa dalampasigan.
Sigun sa report, nagpuon an gabos mantang naglilinig nin mga rock pools an grupo ni Emma Lamport kan Beach Academy CIC kan manutaran ninda an mga itom na leather shoes na pigkakarkulong gikan pa kan taong-19th century.
Sa laog sana kan sarong semana, naka-kolektar sinda nin labi 200 pidaso asin sa kabilogan nagpakol na sa 400 an narekober na mga sapatos, na an pira an nasa marhay pang kondisyon mantang an iba an sararadit na garo pang-aki o pambabae kan enot na panahon.
Sigun sa local historians, posibleng an mga ini an gikan sa sarong naglubog na Italian cargo vessel na nagbangga sa harani sa “Tusker Rock” may 150 taon na an nakakalihis.
Na posibleng an kargamento kan nasambitan ng barko an nabaon sa dalnak kan salog o sa irarom kan dagat asin ngunyan sana padikit-dikit na nagluwas huli sa pagkaraot kan barko o pagbabago kan agos kan tubig.
Alagad maski pigkokonsiderar ini komo “pagiromdom sa nakalihis” kan mga historian, nagdara ini nin kilabot asin interes sa publiko huli sa garo nakakakilabot na paglitaw kan mga personal na gamit kan mga tawong haloy nang nagadan sa dagat.
