NAGA CITY- BacK to normal na an mga eskwelahan sa siyudad nin Iriga makalihis an naeksperyensiyahan na makusog na pag-uran huli sa Bagyong Ada.
Sa entrevista kan Bombo Radyo Naga ki Noel Panga Principal I and Division officer kan DepEd Iriga, sinaysay kaini na mayo man classroom na nalubog sa baha huli sa nasambitan ng raot kan panahon kun kaya naibalik naman sa normal an pagklase.
Sigun pa ki Panga, antes pa an Bagyong Ada nagpalinig na sa mga drainage asin canal an pamayuhan kan DepEd Iriga tanganing malikayan na mas orog pang mag-apaw an tubig.
Siringman nagkaigwa nin suspension sa gabos na lebel kan klase sa Iriga kaibahan na digde an paramientras na suspension kan Palarong Panglungsod.
Alagad pig-asegurar man ni Panga na yaon an learning Continuity Plan na pigpautob na boot sabihon maski kanselado an Face to face classess nagpapadagos pa an pagkanood kan mga estudyante.
Mientrastanto, huli ta marhay na an panahon, liwat naman na na-resume an pigkukundusir na Palarong Panglungsod kun saen ipapadagos an mga napauktaba na event siring kan table tennis, arnis, volleyball, swimming, sepak takraw, football asin iba pa.
Apwera digde, piglalaoman man na mai-extend an basketball hasta sa aga huli sa kakulangan sa oras.
Katakod kaini, an siisay man na atleta na manggagana sa Palarong Panglungsod iyo an marepresentar sa Regional level na suportado kan bilog na DepEd Bicol.
Sa ngunyan, nagpasalamat na sana an opisyal sa gabos na saindang nakakatabang tanganing magtinir na salbado an mga kaakian sa panahon kan kalamidad.
