Kinumpirmar kan Makabayan bloc asin mga progresibong grupo na inako na kan Office of the House Secretary General an ikaduwang reklamong impeachment kontra ki Presidente Ferdinand Marcos Jr., makalihis ining dae akuon kan nakalihis na semana huli ta nasa ibang nasyon si House Secretary General Cheloy Garafil.
Sigun sa Makabayan, dae nagtao nin kasiertuhan si Garafil kun an ikaduwang reklamo an tulos na ipapasar sa opisina ni House Speaker Faustino “Bojie” Dy III, o kun ini an pag-iiribahon sa naenot na petisyon antes isumiter sa plenaryo kan Kamara.
Kasabay kaini, liwat na pighurot kan mga lehislador an probisyon kan 1987 Konstitusyon na nagsasaysay na dae pwedeng puonan an labi sa sarong impeachment proceeding kontra sa parehong opisyal sa laog nin sarong taon, bagay na pwedeng makaapektar sa pag-usad kan mga reklamo.
Sa ngunyan, nagtitinir na bakong malinaw an masunod na lakdang kan Kamara katakod kan ikaduwang reklamo na pigsunad kontra sa Presidente.
Nakatuon an reklamong impeachment na inindorso kan Makabayan bloc na pigkonsiderar na “BBM Parametric Formula,” sarong polisiya kan Department of Public Works and Highways (DPWH) na boot sabihon Baselined-Balanced-Managed asin kapareho man kan inisyal kan Presidente.
Sigun sa Makabayan, ginamit soboot an nasambitan ng pormula komo basehan sa pagtatagama nin mga pondong pang-imprastraktura kan ehekutibo asin Kongreso sa pambansang badyet.
Hurot kan grupo, ini man an nagin basehan kan soboot mga kickback o promesang pabor katakod kan mga proyekto.
