NAGA CITY- Nangapudan an pamayuhan kan DepEd Camarines Sur na gibuhong simple alagad makabuluhan an pagtatapos kan school year.
Sa entrevista kan Bombo Radyo Naga ki Atty. Salvador Bogs Pelingon an Division Information Officer kan DepEd-Camarines Sur, sinaysay kaini na sa huring semana kan bulan nin Marso partikular sa petsa 30 asin 31 isasagibo an graduation o closing ceremony kan gabos na mga eskwelahan sa bilog na Pilipinas kabali na an Camarines Sur.
Ini an isasagibo makalihis sana an ika-apat na quarterly test asin maitao an final grade.
Sigun ki Pelingon, dae kaipuhan na magin magarbo an aktibidad, kaipuhan sana na dae paglingawan an totoong obheto kan okasyon orog na para sa mga kaakian. Ini soboot kaya an aldaw kan pagtaong onra sa saindang nagin accomplishment sa bilog na school year.
Paliwang pa ni Pelingon na nagpuon an kralasehan sa bulan kan Hunyo huli ta nagbalik na an calenday year sa orihinal kaining schedule.
Alagad pigsaysay man ni Pelingon na pwedeng mabago an pigtalaan na schedule o petsa enkaso igwang magbungkaras na raot kan panahon.
Mientrastanto, liwat man na nangapudan an opisyal sa mga paratukdo na isumiter an pighahagad na mga mandatory reports tanganing dae maabala an saindang bakasyon.
Sa ngunyan, pigsierto man ni Pelingon na dagos-dagos sinda sa pagbibilog nin mga programa na makakatabang sa mga estudyante asin mga paratukdo.
