NAGA CITY- Padagos na pigtutulod kan pamayuhan kan Barangay Peñafrancia, Naga City an mapadapit sa HIV awareness, safe sex asin family planning.
Sa entrevista kan Bombo Radyo Naga ki Jacky Villafuerte, Barangay Kapitan kan nasambitan ng lugar, sinaysay kaini na kaipuhan magin bukas kan publiko sa urulay na ini huli ta nagtitinir na problema kan nasyon o komunidad an dapit sa naglalangkaw na kaso kan HIV, amay na pagbabados kan mga jovejnes, pagteos huli sa pagdakol kan populasyon asin iba pa.
Sigun pa ki Villafuerte, saro sa saindang proyekto o programa sa barangay an pananao nin condom kun saen kasuudma sa pagselebrar kan Valentine’s Day nagheras sinda kaini para sa mga residente asin sa iba na mawot magkua.
Paliwanag kan opisyal, parte an lakdang na ini sa saindang mahigot na kampanya na labanan an pagkuriyat kan helang na HIV asin maipromoter an safe sex sa gabos. Positibo man soboot an response kan mga tawo asin nagin matrayumpo an saindang kampanya.
Apwera digde, yaon man an mga pigkukundusir na seminar sa komunidad, pakikipag partner sa LGBTQ+ community asin pakikipag tie up sa mga eskwelahan asin iba pang institusyon.
Importante soboot ini tanganing mas magin mahewas an sakop kan programa. Dugang pa kan opisyal apwera sa pananao nin condom, igwa man sindang nakatagamang pondo sa maintenance medicine , vaccination, vitamins, bulong asin iba pa na parte kan saindang programang pansalud.
Mientrastanto, pigheras pa kan Kapitan na 100% sindang nagsusunod na sa pigpapautob na Anti-Epal policy kan DILG kun saen pinahali na kaini an mga pangaran kan opisyal kan Barangay sa mga lunadan, buildings, taurpalins asin iba pa.
Pigtawan duon ni Villafuerte na importante an pagsunod sa polisiya na ini tanganing magserbeng panalmingan sa gabos na an pagseserbisyo sa tawo dapat udok sa boot.
Sa ngunyan, pigsierto na sana kan opsiyal na padagos an saindang pagbilog nin mga programa na makakatabang sa saindang mga nasasakupan.
