Pigsierto kan Department of Foreign Affairs (DFA) na operational na an gabos na communication networks kan ahensya sa Middle East asin pwedeng gamiton kan mga Overseas Filipino Workers (OFWs) asin mga kababayan na naiipit sa kariribokan sa rehiyon.
Sa pagdangong sa Senate Committee on Foreign Relations, pigsierto ni Asec. Pigsierto ni Ezzedin Tago na mantenidong bukas asin responsive an mga service line kan mga foreign service posts, sa ibong kan mga naenot nang bareta na dae nasisimbagan an mga hotline.
Segun sa DFA, tinawan sinda nin instruction na magsimbag tulos sa mga post asin bukas an linya para sa mga pangapodan asin asistensya hale sa mga kababayan. Kadaklan sa mga embahada nagbugtak man nin mga WhatsApp channel para sa pagbantay kan mga pangyayari asin tulos na pagresponde. Pig-a-update man ninda an mga numero nin telepono kan embahada asin kan Migrant Workers Office (MWO), asin paoro-otrong pigpopost ini sa mga opisyal na social media account kan gobyerno.
Mientrastanto, sinabi ni Hans Leo Cacdac, Secretary kan Department of Migrant Workers na nakipag-olay na sinda sa mga Pilipinong komunidad sa walong nasyon sa rehiyon para sa padagos na monitoring. Idinagdag pa kaini na igwa nin limang nasyon na pigkokontak ngunyan kan DMW tanganing magpoon nin repatriation efforts kun kinakaipuhan.
