Padagos na nagtitinir halangkaw asin nakakaalarma an lebel kan acute food insecurity asin malnutrition na sa manlaen-laen na parte kan kinaban, segun sa pinakabagong report kan Global Report on Food Crises (GRFC) 2026.
Base sa report, pigkakarkulong 266 milyon katawo sa 47 nasyon an nakaeksperyensya nin acute food insecurity kan 2025—katumbas kan haros 23% kan populasyon na pigsurvey.
Ipinapahiling man kaini na nadoble an bilang kan mga nagugutom kumpara sa nakaaging dekada, mantang nagdadanay na kritikal an sitwasyon sa kadakol na rehiyon. Kabali sa mga mayor na kawsa kan krisis iyo an padagos na armed conflict, grabeng epekto kan pagbabago kan klima, asin pagbagsak kan ekonomiya, na orog na nagpapakumplikado sa pagkua nin kakanon kan mga tawo.
Susog sa report, sobra sa 80% kan mga apektado yaon sa mga nasyon na may haloy nang krisis, kun saen an epekto kan gera asin pagbalyo iyo an nangingibabaw. An mga kaakian partikularmenteng apektado man, na may 35.5 milyon na kaakian na nagtitios nin grabeng malnutrisyon, asin minilyon pa an namemeligro sa mas grabeng mga kondisyon.
Mientrastanto, inireport man na duwang lugar—an Gaza asin Sudan—an nakaeksperyensya nin opisyal na tiggutom kan 2025, an pinakaenot sa kasaysayan kan report.
An mga eksperto nagpapatanid na an sitwasyon pwedeng maggrabe sa 2026 sa padagos na mga iriwal, nag-kakawsa sa taas presyo nin kakanon asin enerhiya, asin nabawasan na pondo para sa humanitarian aid.
Huli kaini, an International Organization naghahagad nin apuradong aksyon asin orog na suporta tanganing malikayan an mas grabe pang mga krisis sa pagkakan asin nutrisyon .
