Ipinahayag ni House Deputy Speaker asin National Unity Party (NUP) chairman na si Ronnie Puno na labi sa kabanga kan 55 miembros kan saiyang grupo an nagsusuporta ngonian sa impeachment complaints laban ki Bise Presidente Sara Duterte.
Dugang pa ni Puno, saro pang round nin konsultasyon an makondusir kan mga kongresista sa saindang mga constituentes antes an piglalaoman na pagboto sa Lunes, Mayo 11.
Aminado si Puno na sa primero negatibo an mayoriya kan saiyang partido sa impeachment, alagad ngonian malinaw na pabor an mayoriya na pigkakarkulong maabot sa 30 miembros na ipadara an reklamo sa senado.
Pigduon man kan NUP na gagamiton kan conscience vote an saindang mga miembros sa isyu kan impeachment kan bise presidente.
Mientrastanto, nagpasalamat si Manila 2nd District Rep. Rolando Valeriano sa saindang lider sa pagtao sainda nin katalingkasan na magpili kan saindang paninindugan asin na mayo nin pinipirit sa isyu kan impeachment.
