Supisyente an supply kan bagas sa rehiyon bicol na kun sain kan nakalihis na taon, nagtaas an produksyon kan bagas nin 2.38% mantang an harvest nasa 1.2 million metric tons asin 103 % sufficiency na boot sabihon sobra pa nin 3 % para bilog na populasyon kan rehiyon.
Sa intrevista kan Bombo Radyo Naga ki Lovella Guarin, an Spokesperson kan Department of Agriculture Bicol, sa primerong quarter kan taong 2026, nagtaas nin 1000 metric tons an produksyon kan bagas asin an area harvested kan paroy na kun sain nagpakol sa 75,349 hectares.
Segun pa sa opisyal na katuwang kan Depatment of Agriculture an National Food Authority na kun sain iyo man an in-charge sa buffer stocking kan bagas alagad halangkaw pa man giraray an presyo kan lokal na bagas huli ta halangkaw man an farm gate price kan paroy.
Mientrastanto, marurumduman na kan nakalihis na taon nagbaba an presyo kan paroy na kun sain nakapagpadisganar ini sa mga paraoma na liwat na magtanom nin paroy alagad ginibo man an gabos kan Department of Agriculture tanganing maitaas an farmgate price kan paroy asin matabangan an mga paraoma gikan sa pagkalugi.
Sa presente nagpapakol sa P24 hasta P26 an kada kilo kan dried palay mantang mantang nasa P17 hasta 18 an fresh palay bakong siring kan nakalihis na taon na nagbagsak sa P10 hasta p12 an kada kilo kan fresh palay.
Alagad sa ibong kan halangkaw na presyo kan paroy, nagtataas man an presyo kan bagas huli ta nagtataas man an production cost kun kaya an average amount kan well-milled rice nagpapatak nin P50 hasta 54 per kilo na mas halangkaw kaysa sa mga imported na bagas.
