Nag-abot sa Pilipinas si Paraguayan President Santiago Peña para sa saiyang opisyal na pagbisita sa nasyon kan Mayo 10 hasta 11.
Pigsabat an Paraguayan delegation sa Ninoy Aquino International Airport Terminal 1 kan Domingo nin hapon, hale sa Taipei, Taiwan kun saen nagkondusir man ini nin separadong opisyal na pagbisita.
Segun ki Malacañang, ini an pinakaenot na pagbisita kan presidente sa pagultanan kan Pilipinas asin Paraguay puon kan magmukna an relasyon diplomatiko kan duwang nasyon kan taon 1962.
An pagbisita may katuyuhan na mapakusog an relasyon kan duwang nasyon sa larangan nin komersyo, pamumuhunan, asin agrikultura.
An opisyal na selebrasyon asin bilateral meeting ni Presidente Ferdinand Marcos Jr. asin Peña nakatalaan na gibohon sa Palasyo nin Malacañang ngonian na aldaw, Lunes, kun saen piglalaoman na mapirmahan an nagkapirang kasunduan sa pagtarabangan.
Ilinadawan man kan Malacañang Palace an Paraguay bilang sarong “emerging partner” kan Pilipinas sa Latin Amerika, na may parehong kamawotan para sa demokrasya, pamamahala nin ley, asin internasyonal na kooperasyon.
