Liwat na nagpagirumdom an eksperto sa ley sa publiko na an ano man na pagraot o salang paggamit kan bandera nasyonal kan Pilipinas may penalidad sa ley sosog sa Republic Act No. 8491 o sa Flag and Heraldic Code of the Philippines.
Sa entrevista kan Bombo Radyo Naga ki Atty. Clarence Joseph M. Ronquillo (Trial Lawyer), sinabi kaini na para sa selebrasyon kan National Flag Month, mahigot na ipinagbabawal kan ley an anuman na pagbabago sa disenyo kan bandera, kaiba na an pagdagdag nin mga tataramon, imahe, simbolo, o iba pang modipikasyon digdi.
Segun ki Ronquillo, kabale man sa pagbabawal an paggamit kan bandera bilang gubing, dekorasyon na bakong susog sa itinalaan na reglamento, o bilang anuman na posibleng magin kawsa nin kawaran nin respeto sa national symbol.
Pigduon man kaini na dawa sa digital platforms asin social media, posibleng magkaigwa nin pagbalga kun babaguhon an disenyo kan bandera para sa content o graphics. Alagad, tinutugutan an paggamit kaini bilang background sa mga materyales na nagtutulod nin nasyonalismo basta dai mabago o madigtaan an opisyal na porma kaini.
Sa irarom kan RA 8491, an sisay man na mapatunayan na nagbalga kan mga probisyon kan ley pwedeng mamultahan nin dai mababa sa cinco mil pesos (₱5,000) sagkod veinte mil pesos (₱20,000), o makulong sagkod sa sarong taon. Parehong pwedeng magmulta asin pagkapreso depende sa grabidad kan pagbalga.
Kun an sarong korporasyon o organisasyon imbuelto sa pagbalga, an mga opisyal na responsable sa siring na entidad puwedeng manimbag sa irarom kan ley.
Kaiba man sa mga ipinagbabawal na gawe an dai awtorisadong paggamit kan eskudo nasyonal asin an pagliliwat kan opisyal na liriko, tono, o ritmo kan awit nasyonal na “Lupang Hinirang.”
Susog sa mga nagpapaotob kan ley, an pagsunod sa RA 8491 nagdadanay na mahalaga tanganing mamantenir an dignidad kan mga simbolo nasyonal asin mapararom an paggalang asin pagkamoot kan mga Pilipino sa saindang nasyon, orog na sa panahon nin marikas na pagdakol kan digital na laog sa social media.
