Nakatalaang magsagibo nin special elections an ikaapat na distrito nin Cavite ta nganing magpili nin iriribay kay dating Rep. Kiko Barzaga.
Kaipuhan kan Cavite nin bagong kongresista nin huli ta nabakante ni Barzaga an saiyang opisina makalihis ining patalsikon kan Kamara de Representantes sa botong 265 pabor sa prupwestong nagpapahali saiya sa puwesto. Basado ini sa findings hali sa House ethics committee, kun sain suboot nanotaran an mga pagbalgar ni Barzaga sa panuntunan na Repeated interruption of plenary sessions, mockery of leadership, asin Unauthorized magin slanderous live broadcast sa tahaw kan budget plenary sessions.
Nangyari suboot an mockery of leadership kan si Rep. Ferdinand Martin Romualdez pa an Speaker of the House.
Marurumduman na duwang beses nang pigsuspendir sa serbisyo an dating lehislador makalihis an citation kan mga nasambitang pagbalgar. Antes pa an borotohan kontra kay Barzaga, pig-aantisiparan na an pagpapahali sa iya sa puwesto.
Si Barzaga an ikatulong kongresista na napatalsik sa puwesto. Naenot nang pinatawan nin expulsion kan kaidto’y Philippine Assembly si dating Manila 1st District Rep. Dominador Gomez kan taong 1908 nin huli suboot sa political rivalry, na pigsundan man kan pagkakahali sa dating kongresista nin Negros Oriental na si Arnie Teves Jr. makalihis manotaran an saiyang haloy na pag-absent sa mga sesyon katakod kan saiyang pag-apply nin asylum sa Timor-Leste sa kasagsagan nin kontrobersiya na imbuwelot ini sa pagkagadan ni dating Gov. Roel Degamo.
Mientrastanto, segun kay Commission on Elections (Comelec) chairman George Garcia, mahanap pa ini nin pondo na gagamiton ta nganing maging posible an pagkondusir nin espesyal na pirilian sa 4th District kan nasambitang probinsya. Paliwanag pa kan pamayo nin poll body, dai kaya suboot kabali iniyong aktibidad sa saindang napagpreparan para sa presenteng taon.
Dai pa man ipigkokumpirmar kung nuarin an partikular na petsa ta nganing ikondusir an pirilian. Alagad segun sa panuntunan, kinakaipuhang magkaigwa nin ereleksyunan nin dai mababa sa 60 aldaw o malagpas sa 90 aldaw makalihis opisyal na maging bakante an sarong elective position.
Kun bibilangon, inaantisiparan na magkakaigwa nin special elections sa ikaapat na distrito nin Cavite makalihis an enot na aldaw nin Agosto ngunyan na taon o antes an katapusan kan nasambitang bulan.
Marurumduman na nanggana si Barzaga kan 2025 midterm elections sa botong 165,942.
