Aaramon kan mga otoridad kun igwa bang koneksyon sa kaso kan puganteng si Atong Ang an poco mas o menos 1,400 na tulang nin mga tawo na nahiling sa Taal Lake.
Makalihis ining ianunsyar kan Philippine National Police (PNP) Forensics Group na nakua kaini an nasambitang numero kan mga tulang kun sain isasairarom nguna ini sa medico-legal, anthropological, radiographic imaging, dental, asin DNA testing.
Maaaraman sa mga lakdang na ini an pagkakabisto asin rason kun pano nagadan an mga biktima antes mahiling an mga natada kan saindang mga hawak.
Enkasong makakua nin bastanteng DNA samples, ipapadara suboot ini sa mga laboratoryo kan nasyon para sa mas halawig pang pag-aadal kan mga natada. Pwedesir man suboot makipagtabangan an mga otoridad sa mga laboratoryo kan Japan ta nganing makakua nin mas detalyadong resulta.
Alagad sa estado ngunyan kan mga tulang, aminado an grupo na masakit makakua nin samples nin huli ta kontaminado na an mga ini nin mga nagkapirang particle na nakua nin huli sa suboot pagkasulo kan mga hawak nin mga biktima asin sa halangkaw na temperatura kan dara kan pagkakalubog kaini sa nasambitang katubigan. An pautro-utrong pagkua nin samples asin nagkapira pang malyabeng lakdang ang ginigibo kan forensic group ta nganing mamakua nin tultol na resulta kan ebidensya.
Parte ini kan nagpapadagos na imbestigasyon kontra kay Ang, na nahahampang sa kasong kidnapping with homicide asin serious illegal detention.
Si Ang asin an 21 pang nagkapirang suspek an pigtutukdong may gibo sa pagkawara nin mga sabungero. Pirang beses na ining pigsirbihan nin warrant alagad dai pa nahihiling kun hain talaga si Ang.
