Mahigot na seguridad asin mas pinakusog na presensya kan kapulisan an pig-implementar para sa pagbubukas kan klase ngonian na semana sa manlaen-laen na eskwelahan sa probinsya kan Camarines Sur.
Sa intrevista kan Bombo Radyo Naga ki PltCol Josefa Sylvia Zape-Spokesperson CSPPO, sinabi kaini na nagdeploy na nin mga pulis sa mga eskwelahan kan Presentacion asin iba pang parte kan probinsya tangani na masierto an kaligtasan kan mga estudyante, paratukdo, asin mga magurang sa pagbalik kan mga ini sa eskwelahan.
Parte kan lakdang iyo an pagbugtak nin Police Assistance Desks sa mga entrada kan mga eskwelahan na maserbing tulos na tabang sa anuman na insidente, siring man an pagtao nin traffic guidance asin pagmantenir nin kaayusan sa palibot kan mga eskwelahan.
Sa enot na semana kan klase, igwa man nin mga dagdag na pulis na nakadestino na magsagibo nin regular na pagpatrolya sa mga eskwelahan, orog na sa oras nin pag-eskwela asin oras nin pagpahale, ngani na maibitaran an ano man na mga malfunction asin insidente nin krimen.
Tinawang-duon kan pulisya na katuyuhan kan saindang operasyon iyo na masierto an ligtas, areglado, asin matoninong na pagbalik sa eskwelahan kan mga estudyante sa tahaw kan piglalaoman na pagdagsa kan mga tawo sa mga eskwelahan.
Padagos an pakikoordinar kan kapulisan sa mga lokal na gobyerno asin mga eskwelahan para mamantenir an seguridad sa bilog na school year.
