Nakapagpaputok umano ng hindi bababa sa 33 bala ang 14-anyos na suspek na si alyas “Nash” sa naganap na pamamaril sa San Jose National High School na ikinamatay ng tatlong estudyante at ikinasugat ng 20 iba pa.
Ayon sa mga imbestigador, nagawa pa umano ng suspek na mag-reload ng kanyang baril habang isinasagawa ang pamamaril.
Batay sa pahayag ni Allen Rae Co, tagapagsalita ng Philippine National Police (PNP), nakarekober ang Scene of the Crime Operatives (SOCO) ng kabuuang 34 na basyo ng bala mula sa lugar ng insidente.
Sa nasabing bilang, 21 ang cartridge cases na nagamit na, habang 13 naman ang live cartridges na hindi pa napapaputok.
Ayon pa sa opisyal, posibleng ilang beses nagpalit ng magazine ang menor de edad na suspek habang nagaganap ang insidente. Gayunman, dalawang magazine lamang ang narekober ng mga awtoridad—ang isa ay wala nang laman at natagpuan sa loob ng paaralan, habang ang isa naman ay nakakabit pa sa baril.
Nakuha mula kay alyas “Nash” ang isang 9-mm Glock 17 pistol na may kapasidad na magkarga ng 17 bala. Batay sa ulat ng pulisya, ang naturang armas ay rehistrado sa kanyang tiyahin na isang abogadong pulis na nakatalaga sa Police Regional Office 8.
Samantala, ang isa pang suspek na si alyas “Rod,” 15-anyos, ay nakapagpaputok umano nang isang beses bago siya naunahan at napigilan ng mga awtoridad bandang alas-9:30 ng umaga noong Lunes.
Naganap ang pag-aresto kay alyas “Rod” sampung minuto matapos marinig ang unang mga putok sa paaralan. Narekober mula sa kanya ang isang .38 caliber revolver na may karga pang limang live bullets. Ang naturang baril ay nakarehistro naman sa isang security agency sa Cebu City kung saan dating nagtatrabaho ang kanyang lolo.
Patuloy pa ring iniimbestigahan ng mga awtoridad kung paano naipasok ng dalawang estudyante ang mga armas sa loob ng paaralan.
Nilinaw naman ng PNP na hindi pa kumpirmado ang anggulong bullying bilang motibo sa krimen, dahil batay pa lamang ito sa mga pahayag ng mga suspek at kailangan pang beripikahin sa mas malalim na imbestigasyon.
