Nagpakol sa P19.065 Trillion an total kan utang kan gobyerno kan Pilipinas sa pagtatapos kan Hunyo, segun sa Bureau of the Treasury (BTr).
Mas halangkaw ini nin P518.98 Bilion kumpara sa P18.546 Trillion kan katapusan kan Mayo, asin mas halangkaw man kaysa P17.267 Trillion na nairehistro kan Hunyo kan nakalihis na taon.
Segun sa BTr, an 2.8% pagtaas kan utang kawsa kan mas dakulang pangungutang kan gobyerno, sa laog asin sa luwas kan nasyon, tanganing mapondohan an mga programa.
Nakatabang man an mas makusog na piso tanganing mabawasan nin pagtaas kan kabuuang utang. Nag-abot sa P12.837 trilyon an domestic debt o utang sa laog kan bansa. Mas halangkaw ini nin 2.74% kompara kan Mayo asin 7.43% kumpara sa kaparehong panahon kan naglihis na taon. Gabos kaini gikan sa government securities.
Sa naturang panahon, nakapagrehistro man an gobyerno nin P342.93 Billion na net issuance kan government securities, mantang nabawasan nin P0.60 Bilion na kantidad kan onshore dollar bonds huli sa pagkusog kan piso.
Mientrastanto, nag-abot sa P6.227 Trillion an External Debt o utang panluwas, mas halangkaw nin P176.66 Billion hali sa P6.051 Trilllion kan katapusan kan Mayo. Ini bunga kan dugang na pangungutang sa ibang nasyon na katumbas nin P223.11 Billion.
