Inihayag kan Qatar na uminusad na an ulayang pangkatuninungan sa pag-ultanan kan Estados Unidos asin Iran, bagay na nagpababa kan presyo kan langis sa pangkinaban na merkado.
Segun sa Qatar, diniskusyon nina U.S. President Donald Trump asin Emir Sheikh Tamim bin Hamad Al Thani an mga lakdang tanganing maparani an posisyon kan Washington asin Tehran asin maibalik an normal na sitwasyon sa Strait of Hormuz.
Ininsister kan Iran na mayo pang pormal na negosasyon na isinasagibo an Amerika.
Mientrastanto, sinabi kan Iran na nagpapadagos an positibong pag-uulay kaini sa Oman manungod sa ligtas na pag-agi kan mga barko sa Strait of Hormuz, alagad nagtitinir na sarado an naturang ruta sa dakulang parte kan suplay kan langis asin liquefied natural gas sa bilog na kinaban.
Sa ibong kaini, nagpapadagos an tensyon sa rehiyon kun sain sarong Cargo Vessel an tinamaan kan dae pa maaraman na projectile harani sa Strait of Hormuz, mantang sarong barko kan Indian an luminubog harani sa kadagatan kan Yemen makalihis matamaan kan projectile missile.
Naisalbar an gabos na 14 na tripulanteng sakay kan naturang barko.
Mientrastanto, sinabi kan Qatar na padagos an saindang koordinasyon kaiba an Oman asin Pakistan tanganing mapautob an peace talk, mantang naglalaom an mga opisyal kan U.S. na pwedeng magka igwang kasunduan sa pagbubukas kan Strait of Hormuz sa mga masurunod na aldaw.
