Mayo nang pag duwa-duwa.
Dae na kinaya kan Converge an apat na magkakasunod na pagkadaog, na pwede makaraot kan saindang palaom na makalaog sa playoffs. Kaya nagsagibo an koponan nin sarong siryusong pag urulay tanganing atubangon an saindang sitwasyon. Nagkasararo an gabos sa sarong bagay an panahon na bumalik sa saindang pundasyon—an matibay na depensa.
Asin ini mismo an ipinahiling kan FiberXers kan atubangon ninda an giant killer na Terrafirma, na nagresulta sa sarong kumbinsidong 120-103 pagkagana kasubanggi sa Ynares Center-Antipolo asin giraray nagpasigla sa saindang kampamya sa PBA Governor’s Cup
Huli sa pagkaganang ini, umangat sa 4-4 an kartada kan Converge asin nagtinir sinda sa ikaapat na puwesto sa Group A, sarong gana an saindang lamang sa nasa ikalimang puwesto na Dyip (3-5) sa karera para sa mga tiket sa quarterfinals.
Ipinahiling kan FiberXers an saindang matatag na depensa sa pamamaagi kan 10 steals asin limang blocks kontra sa Dyip
Nagsilbing mga harigi kan depensa kan koponan sina Cameron Clark, an ikatulong import kan Converge sa conference, asin beteranong si Calvin Abueva.
Mientrastanto, ipinahiling man kan NLEX an saindang pagiging kalmado dawa na nawara si DeQuan Jones huli sa bari sa tuhod sa third quarter. Nagibo pa man kan Road Warriors na daugon an TNT sa overtime, 118-111.
Umiskor si Robert Bolick nin 27 puntos, kabali an duwang late three-pointers sa regulation, mantang si LJay Gonzales man an nangenot sa overtime makalihis magrehistro nin career-high na 26 puntos.
Huli sa pagkagana, bumawi an Road Warriors sin umangat sa 7-1 an saindang kartada, mantang bumagsak man sa 4-4 an Tropang 5G.
