Nagpatanid si Presidente Vladimir Putin kan Rusya na posibleng magbalos an Rusya matapos na detenido kan mga nasyon sa Solnopan an nagkapirang mga barko komersyal na konektado sa Moscow.
Durante kan pagbisita sa sarong barkong panggiyera kan Russia na nagpartisipar sa sarong Exercise sa Pacific Ocean, sinabi ni Putin na an pag-agaw sa mga barko sarong pagbalgar sa International Maritime Law.
Segun ki Putin, kun magpapadagos an siring na mga lakdang, mapipiritan an Russia na magbalos. An posibleng simbag kan Moscow bako man limitado sa lugar kun saen an mga barko nakumpiskar, asin ini pwedeng gibohon sa arin man na lugar na sa paghona kaini kaipuhan, kaiba an Pacific Ocean.
Mientrastanto, si Adm. Viktor Liina, hepe kan Pacific Fleet kan Russia, nagbareta na an saindang navy andam nang magsagibo nin mga inspeksyon asin pagdetener kan mga barko na pagsasadiri o ginagamit kan mga nasyon na inaapod nindang “unfriendly nations.”
Susog sa dating Presidente kan Russia na si Dmitry Medvedev, an Russia pwedeng mapalawig an mga operasyon kaini sa ibong kan Dagat na Itom. An mga pahayag kasunod kan implementasyon kan mga sanksyon kan Solnopan laban sa inaapod na “shadow fleet” kan Russia, na sinasabing ginagamit tanganing makalikay sa mga sanctions na may relasyon sa giyera sa Ukraine.
