Pig-enakminar kan sarong ekonomista sa Kongreso na magsagibo nin lubos na pagrepaso sa propwestong ₱7.2 trilyon na National Expenditure Program (NEP) para sa 2027 tanganing maseguro na an mga pondo kan publiko ginagamit nin tama asin episyente.
Sa intrivesta kan Bombo Radyo Naga ki Dr. Emmanuel Onsay, Partido State University Assistant Professor and Economist, sinaysay kaini na an nangengenot sa alokasyon iyo an basic education na ₱967 bilyon, public works na ₱644 bilyon, health na ₱353.8 bilyon asin interior and local government na ₱332.5 bilyon. Segun sa ekonomista, rasonable an halangkaw na pondo para sa imprastraktura, alagad kaipuhan na maseguro na mapasiring ini sa mga tamang proyekto.
Tinawan man nin duon ni Onsay an pangangaipo na dagdagan o papagdanayon an suporta para sa agrikultura, social welfare asin mas halangkaw na edukasyon, orog na sa Rehiyon Bikol na labi-labi an pagsarig sa agrikultura asin igwa nin halangkaw na insidente nin katiosan.
Idinoon man kaini na an alokasyon kan budget dapat na nakabasar sa performance. An mga ahensya na epektibo an paggamit kan pondo dapat tawan nin magkakanigong suporta, mantang an mga programa na may hababang resulta o bakong tamang paggamit nin pondo dapat repasuhon.
Nangapudan an ekonomista si Onsay nin istrikto, obhetibo asin transparent na budget scrutiny tangani na maseguro na an lambang piso kan publiko mapaduman sa tamang programa asin mapapakinabangan kan mga tawo.
