Kumpiyansa an House Prosecution Panel na magigin patas asin impartial an mga senador-huwes sa impeachment trial ni Bise Presidente Sara Duterte.
Segun sa House Prosecution spokesperson asin Lanao del Sur Rep. Zia Alonto Adiong, piglalaoman ninda na susunudon kan mga Senator-Judges an reglamento kan impeachment court asin irespeto an proseso.
Pigduon man kan piskalya an importansya kan personal na pag-atendir kan mga senador-huwes sa mga hearing.
Sinabi ninda na mas makakatabang ini tanganing direktang mahiling asin madangog an mga testigo asin ma-assess an saindang mga pahayag, aksyon asin paagi nin pagsimbag.
Mientrastanto, sinabi ni Manila Rep. Joel Chua na nagsumpa an mga senador-huwes na maging politically imparcial sa saindang paghusga.
Segun sa piskalya, an mga senador-huwes dapat na magbasar kan saindang mga desisyon sa ley, evidenciang iprinesentar asin sa saindang personal na obserbasyon durante kan pagbista, asin bako sa political considerations.
Alagad, piglinaw kan piskalya na dae ninda hinahagad sa presiding officer na piriton an mga senador na mag-atendir nin personal, huli ta an bagay kan saindang pag-atendir yaon pa sa poder kan impeachment court.
