Makakagibo nin kasaysayan an broadway asin International Theater Icon na si Lea Salonga sa paagi kan pagigin pinakaenot na Pilipina na nakaresibe nin star sa Hollywood Walk of Fame.
Si Lea Salonga tatawan nin onra kan saiyang ika-2,855 star sa Setyembre 4 sa Hollywood Boulevard, sa atubangan kan The Pantages Theatre.
An seremonya gigibohon kan Emmy Award-winning Journalist na si Sibley Scoles, mantang an aktres asin kapwa Walk of Famer na si Ming-Na Wen iyo an magigin Guest Speaker.
Si Lea asin Wen haloy nang magkabisto sa paagi kan Disney animated film na Mulan. Si Lea nagkanta komo boses ni Mulan sa Mulan asin Mulan II, mantang si Wen nagserbing nagtataram na boses kan karakter.
Susog sa Hollywood Chamber of Commerce, si Lea midbid bilang sarong trailblazer na nagtao nin inspirasyon sa mga paradalan sa bilog na kinaban sa paagi kan saiyang talento asin mga dekada na karera sa teatro.
Apwera sa Hollywood Walk of Fame, si Lea tatawan man nin onra kan Icon Award sa Manila International Film Festival Closing Night Awards Gala sa Setyembre 6 sa Beverly Hills, California.
Si Lea Salonga midbid na marhay sa saiyang Tony Award-winning na pagganap komo Kim sa musical na Miss Saigon. Nakaresibe man siya nin iba pang prestihiyosong mga premyo sa theater, kabali an Olivier, Drama Desk, Outer Critics Circle asin Theatre World Awards.
Nagluwas man siya sa mga produksyon sa Broadway kan Les Misérables, Once on This Island, Allegiance, Here Lies Love asin Flower Drum Song.
Apwera sa teatro, siya an boses sa pagkanta ni Princess Jasmine sa Disney’s Aladdin asin nabisto komo sarong Disney Legend kan 2011.
