Iprepresentar kan House prosecution team an mga opisyal kan Philippine Statistics Authority o PSA sa impeachment trial laban ki Vice President Sara Duterte, segun ki House Prosecutor Terry Ridon.
Ini tanganing patunayan an mga alegasyon na “fictitious” o gibo-gibo sana an mga indibidwal na tinawan kan confidential funds kan Office of the Vice President o OVP.
Segun sa mambabatas, kaiba an mga opisyal kan PSA bilang mga testigo sa alegasyon nin salang paggamit kan confidential funds, huli sinda an nagsagibo kan pag-aadal asin nagbunyag kaini sa isinagibong House inquiry.
Nagluwas suboot, sa pag-aadal na an mga pangaran sa acknowledgement receipts, arog ni Mary Grace Piattos, Milky Secuya, asin iba pa, dai ipinangaki sa Pilipinas, dai ikinasal asin dai man nagadan sa nasyon, huli ta mayo sindang rekord sa PSA.
Kaya, maipapahiling aniya kan mga opisyal na peke asin gibo-gibo sana an mga indibidwal na ini, na nangangahulugan na igwa nin anomalya asin salang paggamit kan pondo kan publiko.
Enot na ipinahayag kan kampo kan bise presidente kan Pebrero na nakapreparar sindang magpaliwanag sa paggamit nin mga “alias” para sa confidential funds, arog kan kinukwestiyong recipient na “Mary Grace Piattos,” na kahawig kan pangaran nin sikat na brand nin chichirya asin restaurant.
