Ipighiras na puon Setyembre 1, i-impound kan Land Transportation Office (LTO) an gabos na behikulo na gamit an improvised o replika na plaka na mayong awtorisasyon.
Segun ki LTO Chief Markus Lacanilao, kabali sa target kan operasyon an mga behikulo na pinaluwas kan nagkapirang paratinda nin awto na improvised plate sana an ginagamit.
Piglinaw kaini na tanganing maibitaran an huri, kaipuhan na magpahiling nin authorization hale sa LTO an mga driver na naggagamit nin temporaryong plaka.
Ginibo ini ni Lacanilao makalihis na i-impound kan LTO an sarong Porsche 918 na rehistrado sa aktor-negosyanteng si Derek Ramsay, alagad pigmamaneho kan amigo niyang negosyante na si Anthony Violago gamit an improvised plate.
Isinuko na ni Violago an saiyang lisensya sa pagmaneho asin pig-impound na an luhong lunadan. Segun sa report, ipinabakal na ni Ramsay ki Violago an behikulo alagad dae pa naitransfer an rehistro. Si Violago suboot an nagbugtak kan improvised plate asin naghagad nin dispensa sa LTO.
Dugang pa ni Lacanilao, may mga kriminal na naggagamit nin replica plates nganing itago an saindang mga lunadan.
Naghagad man nin tabang an LTO sa Philippine National Police (PNP) tanganing mabisto an mga nasa likod kan iligal na paggibo nin improvised plates.
An paggamit nin improvised plates may multa na P5,000 asin impoundment kan behikulo.
