Nanindugan an Presidente kan Taiwan na si Lai Ching-te na dai ninda itatao dawa sarong pulgada o sarong kabtang kan saindang teritoryo.
Nangangahulugan ini na idedepensa kan Taiwan an lambang parte kan saiyang kadagaan, kaiba an mga saradit na isla arog kan Kinmen, Matsu, asin Penghu.
An Presidente kan Taiwan nagtao kan maisog na pahayag sa saiyang pagbisita sa frontline island kan Kinmen kun saen nagtao siya nin diskurso sa mga beterano sa giyera tanganing girumdomon an ika-68 anibersaryo kan 1958 Artillery Battle kan Agosto 23.
Pigduon man ni Lai na makakamtan sana an katoninongan sa paagi nin kusog. Nagtutubod si Presidente Lai na dai makakamtan an katoninongan sa paagi sana nin paghagad o paglaom na dai maatake an China. Dapat makusog an militar kan Taiwan tanganing matakot an ibang nasyon na sakyadahon.
Sinabi niya na sa ibong kan maraot na panahon, nagduman siya sa Kinmen tanganing ipahayag, sa ngaran kan bilog na nasyon, an saiyang udok sa boot na paggalang asin pasasalamat sa mga bayani, na nagkasararo tanganing isikwal an agresyon kan mga totalitaryong komunista asin protehiran an saindang dagang tinubuan.
Sinabi man kaini na sa laog nin 68 taon, dae nag-ontok an ambisyon kan Tsina na pahiwason an saindang teritoryo dawa sarong aldaw sana. Sinabi niya na ini an nagdadara nin kariribokan sa bilog na rehiyon kan Indo-Pacific, kaya an kapangganahan kan Taiwan kan panahon na idto nakaolang sa ambisyon kan Tsina na sakopon an inaapod na “first island chain.”
Nagpahayag man si Lai kan saiyang suporta sa plano na dagdagan an badyet sa depensa kan Taiwan.
Bilang konteksto kan pangyayari kan Agosto 23, 1958, binomba kan China an isla nin Kinmen. Ini an kapinunan kan “Ikaduwang Krisis sa Taiwan Strait”. An Taiwan nakipaglaban sa tabang kan Amerika sagkod na matapos an iriwal na mayong malinaw na nanggana.
Kritikal an lokasyon kan Kinmen huli an isla haranihon na marhay sa China, mayo pang duwang kilometro an rayo sa baybayon kan China. Ini an nagpapasensitibo sa lugar pag-abot sa depensa kan Taiwan.
